MIAKA 40 YA NEEMA KWA WAAGUSTINO TANZANIA

MIAKA 40 YA NEEMA KWA WAAGUSTINO TANZANIA.

Nyumba ya waagustino Mahanje- Songea 

Wakati Shirika la Mt. Augustino Tanzania linatimiza miaka arobaini (40) tangu lilipoanza kufanya utume wake hapa Tanzania katika Parokia ya Mt. Mikael Mahanje Jimbo kuu la Songea tarehe  9 mwezi Desemba 1977. Baada ya kupita mwaka mmoja mapadre Augustino Perez na Vitalino Malagon wakijifunza lugha na utamaduni wa kitanzania, wakakabidhiwa Parokia na walikuwa wameingia Tanzania 22.5.1976. Katika miaka hiyo 40 ya utume shirika limepanuka kufanya utume wake sehemu mbalimbali za Tanzania. Baada ya kufanya utume wake takribani miaka kumi na tisa (19) katika Parokia ya Mt. Mikael Mahanje Songea, 28.8.1996 ilizinduliwa nyumba ya Malezi Morogoro eneo la Kola Hill kwa ajili ya wanafunzi wa falsafa na teologia na kuanza kutoa huduma ya kichungaji katika vigango viwili kwa parokia mbili tofauti. Kigango cha Pangawe Jeshini ambacho kipo chini ya Parokia ya Mgolole na kigango cha Bwawani ambacho kipo chini ya Parokia ya Chalinze.

Jinsi watawa walivyozidi ongezeka ndivyo na utume ulianza kupanuka 6.1.2001 ikazinduliwa Parokia ya Bikira Maria Mkingiwa dhambi ya asili Mavurunza ambacho kilikuwa kigango cha Parokia ya Msewe-Ubungo Jimbo Kuu Katoliki la Dar es Salaam. Mwezi Januari 2007 ikazinduliwa Parokia ya Mt. Augustino Mkolani katika Jimbo kuu la Mwanza. Haikupita muda mrefu Agosti 2009 ikazinduliwa Parokia nyingine ya Mt. Augustino Temboni Dar es Salaam. Baadaye Januari 2013 Parokia ya Mt. Ambrose Tagaste Dar es Salaam. Pia 1.5.2016 Parokia ya Mt. Rita wa Kashia na mwaka huo huo 21.12.2016 Parokia ya Mt. Monika Buhongwa Jimbo Kuu la Mwanza.

Parokia ya Waagustino Enduimet Arusha

Licha ya huduma za Parokiani kumekuwa pia na shughuli nyingine za malezi zilizopelekea kupata mapadre wazalendo wenye kuhudumia parokia hizi. Zaidi ya hayo kuna sekondari.

SHUGHULI ZA MALEZI

Mwaka 1978 walianzisha shughuli za malezi kwa wanaotaka kuwa watawa katika shirika. Malezi haya yalikuwa yanafanyika Mahanje, baadaye kupanua uwigo ikafunguliwa nyumba ya malezi Morogoro kama tulivyoona huko juu. Nyumba hiyo ilizinduliwa 28.8. 1996 kwa ajili ya wanafunzi wa falsafa na teologia. Na wakawa wanaenda kufanya noviciate Intramuros Manila Ufilipino. Hivyo imefanyika hivyo kwa miaka kadhaa. Lakini wengi wao hawakuweza kuendelea baada ya kurudi toka novitiati na wengi waliacha siku chache kabla ya kwenda.

Mwaka 2011 ikiwa ni maazimio ya mkutano Mkuu wa kati wa Shirika Duniani uliofanyika Ufilipino Septemba 2010 wenye kusistiza unovisi wa pamoja. Basi mwaka 2011 kundi la kwanza lilianza malezi ya novitiate 1.7.2011 katika Parokia ya Mt. Augustino Mkolani kwa kuunganisha delegation ya Tanzania na Kenya. Malezi hayo yamekuwa yakiendelea miaka yote hadi sasa.

Parokia ya Mt. Alipio Mkolani Mwanza

Pamoja na malezi ya kitawa pia mwaka 2014 shule ya sekondari ya Mt. Augustino Tagaste Dar es Salaam na kuanza kupokea wanafunzi mwaka huo. Mwaka huu 2017 wanamaliza kwa mara ya kwanza vijana wa kidato cha nne. Hadi sasa vijana wamekuwa wakifanya vizuri katika mitihani ya taifa ya kidato cha pili na pamoja na kikanda au kimkoa. Tunamatumaini makubwa kuwa kundi hili la kidato cha nne na hata wanaofuata watafanya vizuri katika mitihani yao ya kitaifa.Malezi yao si tu elimu dunia bali pia elimu Mungu na maadili mema.

Mwaka 2017 mwaka wa Neema

Shirika la Mt. Augustino Tanzania mwaka huu umekuwa ni wa neema na mwaka wa kumshukuru Mungu kwa sababu zifuatazo:

Tarehe 8.7.2017 waliweka nadhiri za kwanza vijana wanne katika nyumba ya novitiate iliyopo katika Parokia ya Mt. Augustino Mkolani, Mwanza. Kati ya hao wane mtanzania ni mmoja. Pia kwa mwaka huu kwa mara ya kwanza kabisa tangu shirika liingine Tanzania kupata daraja la upadre vijana sita kwa mara moja. Hayo ni mafanikio ya kuanza malezi kwa ngazi zote hapa Tanzania. Walipewa daraja la upadre 27.7.2017 Madaba Songea. Pia vijana wanne (4) waliweka nadhiri za daima katika nyumba ya malezi Morogoro 10.8.2017.

Sekondary ya Mt. Agustino Tagaste Dsm.

Pamoja na matukio ya nadhiri na upadrisho Delegation ya Tanzania imepata parokia tatu ndani ya mwaka mmoja nazo ni: 20.7.2017 ilizinduliwa parokia ya Enduimet umasaini katika Jimbo kuu la Arusha, 27.7.2017 Parokia ya Mt. Augustino Madaba, Jimbo Kuu la Songea na 20.8.2017 Parokia ya Mt. Josephine Bakhita Korona, Jimbo Kuu la Arusha.

Tunawashukuru maaskofu waliotupokea katika majimbo yao. Kwa hiyo hadi sasa utume wetu hapa Tanzania tunafanya katika majimbo yafuatayo: Jimbo Kuu la Songea katika Parokia ya Mt. Mikael Mahanje na Mt. Augustino Madaba. Jimbo Kuu la Dar es Salaam: Katika Parokia ya Bikira Maria Mkingiwa dhambi ya asili Mavurunza, Mt. Augustino Temboni, Mt. Ambrose Tagaste, Mt. Rita wa Kashia….. pia Sekondari ya Mt. Augustino Tagaste. Katika Jimbo Kuu la Mwanza: Parokia ya Mt. Augustino Mkolani, na Mt. Monika Buhongwa. Jimbo la Morogoro: Nyumba ya malezi Mlima Kola Morogoro. Jimbo Kuu la Arusha: Parokia ya Enduimeit na Mt. Josephine Bakhita Korona.

Parokia Mt, Agustino Temboni Dsm

Hadi sasa delegation ya Tanzania imekuwa na idadi ya mapadre watanzania wapatao 31 na mabradha 3 pia mafrateri wanaojiandaa kwa daraja la ushemasi halafu upadre 4. Na kufanya idadi ya wana nadhiri za daima kuwa 38 idadi inayokaribia kwa idadi ya province ambayo ni 40. Pamoja na idadi hiyo wapo waprofesi wa muda wapatao 11, wanovisi 3 na wapostulanti 9. Hivyo tunasababu za kutosha kumshukuru Mungu kwa zawadi ya miito katika Delegation yetu na kuomba Mungu tuweze kufanikiwa katika ombi la kuwa vicariate kwani kikatiba idadi imejitosheleza na kupita kabisa. Idadi inayotakiwa ya chini ni watawa 20 na miradi yenye kuwezesha watawa kujitegemea.

Nyumba ya Mt. Agustino Morogoro

Nyumba ya Mt. Alipio Mkolani Mwanza

Pindi ambapo Tanzania inafanya jubilei ya miaka 100 ya Upadre, Waagustino tunaungana na wote katika kumshukuru Mungu kwa mchango wetu wa miaka 40 ya utume hapa Tanzania. Tunamshukuru Mungu kwa miaka 40 sasa tangu waagustino kwa mara ya kwanza tukabidhiwe Parokia ya Mahanje tumeendelea kulitangaza neno la Mungu kwa roho ya kiagustino yaani: Kuishi kwa pamoja kama ndugu tukiwa na Moyo Mmoja na Roho Moja njiani kwa Mungu. Kwani umetufanya Ee bwana na Mioyo yetu haitulii mpaka ifike kwako (Conf.1.1). Hatunabudi kama Delegesheni kumtolea Mungu shukrani kwa neema alizo tujalia kwa kipindi chote hiki na kuzidi kumwomba aendelee kumimina neema zake kwa miaka ijayo ya kulieneza neno la Mungu lililo kiini cha furaha kamili ya Mwanadamu.

Pd. Efrem Msigala, OSA

Mkolani Mwanza 2017